Тогтвортой хөгжил дэх хүний хөгжил, төлөвшлийн асуудлууд

Хураангуй

Энэ илтгэлийн гол агуулга нь тогтвортой хөгжихийн тулд эх болсон байгаль дэлхийдээ хайр гамтай хандаж, эрүүл ухаанаар эдийн засгаа хөгжүүлэн, ухаалаг хэрэглээний зарчмаар амьдарч, хойч үеийнхнийхээ ирээдүйг хохироохгүйгээр урагшлан хөгжиж буй нийгмийг бүтээгч хүний төлөвшлийн асуудал юм.

Тогтвортой хөгжлийн философи үзэл санаа нь ирээдүй хойч үеийнхнийхээ хөгжих боломжийг алдагдуулахгүйгээр хүн төрөлхтөн өнөөгийн хэрэгцээгээ ухаалгаар хангах тухай асуудал байдаг. Тэгвэл тогтвортой хөгжлийн материаллаг болон материаллаг бус эх сурвалж нь юу вэ? гэвэл өнөөдөртөө хүн төрөлхтөн өдөр тутмын хэрэгцээний болон урт хугацааны хөгжлийн эх сурвалжаа газар дэлхийн баялгаас авч хэрэглэж байна. Цаашдаа ч нэг хэсэгтээ энэ байдал үргэлжилнэ.

Хүний хэрэглээ, байгалийн даац хэтрээд, хүн төрөлхтөн өнөөдөр байгаль дэлхийн жам ёсны хөгжил, оршихуйд сөргөөр нөлөөлөх хэмжээний хүчин зүйл болсон учраас байгаль, нийгэм, эдийн засгийн тогтвортой хөгжлийн асуудал улам хурцаар тавигдаж байна. Хүн төрөлхтөн өнөөгийн хэт хэрэглээг шүтсэн ийм оршихуйн замаар цаашид явж болохгүй боллоо.

Хүний нийгэм оршин тогтнох үед аливаа үйл явц саарах, тасалдах, зогсох зэрэг саатал савалгаагүй, жигд тогтуун, байнгын өсөлттэй байх нь өөрөө хүн төрөлхтний хөгжлийн үйл явцыг тогтвортой байлгах үндэс болох ёстой. Ийм тогтвортой хөгжсөн нийгмийг хөгжиж, зөв төлөвшсөн хүн л бүтээж байгуулна. Иймээс тогтвортой хөгжлийн боловсролын уриа нь юуны өмнө “Хүнээ хөгжүүлье. Хүнийхээ хүчээр хөгжье. Хүнийхээ төлөө хөгжье” гэсэн уриа байх ёстой (Боловсролын шинжлэх ухааны академи, 2002, 2021, х.1,170). Бид энэ уриаг “Боловсрол судлал” сэтгүүлээрээ 20 жилийн өмнөөс эхлэн сурталчилж байгаа юм.