Багшлахуйн хөгжлийн кластер: Бодлого төлөвлөлтийн баримт бичиг болон боловсролын хуулиудад хийсэн шинжилгээний үр дүн

Хураангуй

Багшийн асуудлаар төрөөс баримтлах хөгжлийн бодлого, урт, дунд хугацааны төлөвлөгөөний хэрэгжилт болон эрх зүйн орчны шинэчлэл нь боловсролын шинэчлэлийг хэрэгжүүлэхэд чухал байр суурь эзэлдэг. Бид багшийн асуудлаар төрөөс баримтлах хөгжлийн бодлого, урт, дунд хугацааны төлөвлөгөөний хэрэгжилт болон эрх зүйн орчныг шинэчлэхэд тооцох шаардлагатай баримт, нотолгоог гаргах зорилго бүхий энэ судалгаанд кластер анализ, магадлан шинжлэх аргуудыг хэрэглэсэн. Бодлого, төлөвлөлтийн баримт бичгүүдэд хийгдсэн кластер шинжилгээгээр багшлахуйн хөгжлийн үйл явцын кластерийн тогтолцооны үе шатууд болон төлөв байдлуудад баримтлах бодлого, төлөвлөлт бүрэн гүйцэт, харилцан хамааралтайгаар тусгагдаагүй байна. Хууль, эрх зүйн баримт бичгүүдэд хийгдсэн шинжилгээгээр багшлахуйн кластерийн “Мэргэжлийн чиг баримжааг олгож, багш мэргэжлийн сонголтыг дэмжих-БК0”, “Ахмад үеийнхний туршлага, нөөцийг ашиглах-БК6”, “Багш бэлтгэдэг сургуульд элсүүлэх-БК1”, “Тэтгэвэр тогтоолгох, ажлаас чөлөөлөх-БК5”-д харгалзах илэрц байхгүй, эсвэл маш цөөн, мөн багш бэлтгэдэг их дээд сургууль (ББИДС)-тай холбоотой тусгайлсан эрх зүйн зохицуулалт байхгүй байгааг тогтоолоо.