Ерөнхий боловсролын сургалтын цөм хөтөлбөрт тогтвортой хөгжлийн үзэл санаа, агуулга, арга зүй тусгагдсан байдалд хийсэн судалгааны үр дүн

Хураангуй

Дэлхий нийтийн түвшинд боловсролын алсын хараа өөрчлөгдөж, сургалтын хөтөлбөр, суралцахуйн удирдамжид ТХБ-ын үзэл санааг тусган хэрэгжүүлэх, ТХБ-той иргэний төлөвшилд онцгойлон анхаарч байна. Гэвч энэ нь амар, хялбар асуудал биш юм. Энэ судалгаагаар бид ЕБС-ийн сургалтын хөтөлбөрт тусгагдсан тогтвортой хөгжлийн үзэл санаа, агуулгыг 3 багц 16 шалгуур 75 индикатораар үнэлэхдээ

баримт бичгийн судалгааны арга зүйг хэрэглэлээ. Судалгааны үр дүнг ЕБС-д судалдаг бүх судлагдахууныг Математик, байгалийн ухаан, Хэл хүмүүнлэгийн ухаан, Түүх, нийгмийн ухаан, Сургалтыг дэмжих үйл ажиллагаа гэсэн 4 бүлэгт ангилж, бага, суурь, бүрэн дунд боловсролын түвшинд ялгаж, сургалтын хөтөлбөрийн бүрэлдэхүүн хэсэг бүрээр боловсруулсан. Судалгаагаар давхардсан тоогоор 5653 өгөгдөл бүртгэгдсэнээс нийт өгөгдлийн 22.3% хөтөлбөрийн зорилго, зорилтод, 7.4% үнэлгээнд, 12.8% агуулгад, 33.1% аргад, 24.4% орчин ба хэрэглэгдэхүүнд тус тус ногдож байна. Сургалтын арга зүй буюу арга ба хэрэглэгдэхүүнд хамаарах өгөгдлүүд нийт өгөгдлийн 57.5% эзэлж, арга нь хэрэглэгдэхүүнээсээ 1.4 дахин олон бүртгэгдсэн. Энэ байдал нь үндэсний сургалтын цөм хөтөлбөрт арга зүйн хэсэг нь маш ерөнхий тусгагдсан байсан тул арга зүйн үнэлгээг илүү нарийвчлан тодруулах үүднээс үнэлгээнд Суралцахуйн удирдамжуудыг нэмж хамруулан үзсэнтэй холбоотой гэж үзэж болно. 2014 оноос эхлэн хүчин төгөлдөр мөрдөж буй бага, суурь боловсролын сургалтын цөм хөтөлбөр бүхэлдээ шинжлэх ухааны мэдлэг, чадвараас гадна өөрийн хүч нөөцийг мэдрэх, бусадтай хамтрах, мэдлэгийг эрж хайх олж судлах арга барилтай болох, өөрийгөө тасралтгүй хөгжүүлэх, зорилго чиглэлтэй амьдарч хөдөлмөрлөх зэрэг хувь хүний хөгжилд хандсан ТХБ-ын үзэл санаа, агуулгыг харьцангуй сайн тусгаж чадсан байна.